Югары Ослан районында “Үлемсез полк” автойөреше узачак

Югары Ослан районы Яр Морквашы авыл җирлеге территориясендә, берничә ел Җиңү көненә “Үлемсез полк” автойөреше уздырыла. Әгәр беренче елларда аны унлап кына машина йөртүче хуплаган булса, быел аңа 30дан артык катнашучы гариза биргән. 

Автойөреш Бөек Ватан сугышында катнашучыларны, тыл хезмәтчәннәрен, концлагерь тоткыннарын, блокадникларны һәм сугыш балаларын хөрмәтләү максатыннан үткәрелә. Икенче ел хәрәкәт кысаларында махсус хәрби операция катнашучыларына игътибар күрсәтелә. Шуңа күрә автойөрешнең тагын бер атамасы - "СВОи герои". Автомобиль хуҗаларына аларны флаглар, герой туганнарының портретлары, шарлар һәм ленталар белән бизәргә тәкъдим ителә.  

"Автойөреш, якшәмбе, 5 майда узачак. Автоколонна Яр Морквашы авылының Идел елгасы яр буеннан 18.30 старт ала, финиш СНТ «Вагонник» янындагы кырда булачак. Соңыннан биредә катнашучы автомобильләр йолдыз формасында тезеләчәкләр. Кырда “Леха Казак” рус җыры ансамбле катнашында күңел ачу-патриотик чара башлана, шулай ук чарада катнашучыларның барысы өчен дә чәй эчү һәм күңел ачу чаралары оештырылачак», - дип сөйләде автойөрешне оештыручы Яр буе Морквашы мәдәният йорты мөдире Аделина Хәйретдинова.  

Билгеләп үтик, "Леха-Казак" рус җыры ансамбле югары осланлыларга яхшы таныш, ә автойөрештә алар беренче тапкыр гына катнашмый. Репертуарларының төп линиясе – Россия халкының данлы каһарман үткәне һәм илһамландыра торган киләчәге. 

"Үлемсез полк" автойөреше - ул безнең геройлар хәтерен хөрмәтләү генә түгел, бу ата-бабаларыбыз белән куәтле рухи бәйләнеш, гаделлек символы, яшь буынны тәрбияләү, әби-бабайларыбызның йөзләре аша Россиянең героик тарихи үткәне турында белемнәр тапшыру", - диде ахырда Аделина Хәйретдинова.