Мәмәтхуҗада квест-уенда авылның тарихы белән таныштылар

Катнашучылар маршрут кәгазе буенча станциядән станциягә йөрделәр, аның барышында алар кече Ватаннарының табигате, истәлекле урыннары, тарихы, географик объектлары белән таныштылар. Аларны җирле риваятьләр, тарихи вакыйгалар һәм җирлек турындагы кызыклы фактлар белән бәйле табышмаклар, биремнәр һәм башваткычлар көтте, алар Туган як тарихының Россия тарихы белән аерылгысыз бәйләнгән булуын ачык күрсәтте.

Катнашучылар китапханәдә туган якны өйрәнү буенча бай материал саклануын күрделәр, анда үз авылыбыз, районыбыз һәм республикабыз тарихының кызыклы битләрен табарга мөмкин. Алар барлыгы дүрт станциядә тукталдылар: «Тарихи», «Атаклы кешеләр», «Туган як табигате» һәм «Мемориал».

Квест-уен яшүсмерләргә үз тирәлекләренә яңача карарга, белемнәрен баетырга һәм онытылмас истәлекләр тудырырга ярдәм итте. Катнашучылар җирле тарих, мәдәният, география, истәлекле урыннар турында белемнәрен күрсәттеләр һәм авылга дан китергән кешеләрнең исемнәрен искә төшерделәр.

Бүгенге көндә дә авыл тарихы дәвам итә. Үсеп килүче буын якташларын, аларның эшләрен, борынгы Мәмәтхуҗа авылының тарихын эшләүче һәм эшләячәк кешеләрне истә тотачак.