“Карга боткасы” фольклор бәйрәмен үткәрү

1 апрель көнне Вахит Мәдәният йортында авыл китапханәсе белән берлектә «Карга боткасы» фольклор бәйрәме үткәрелде.Чарада балалар бу бәйрәмнең гореф-гадәтләре һәм йолалары турында белделәр.

...Борынгы заманда кешеләр язны канат очларында каргалар китерә дип ышанганнар. Шуңа күрә, кар эреп, беренче инешләр барлыкка килгәч, каргалар килү хөрмәтенә, “Карга боткасы” бәйрәме оештырылган. Бәйрәмнең төп катнашучылары балалар булган. Алар өйдән-өйгә йөреп, бәйрәм өчен сый-хөрмәт җыйганнар: ярма, йомырка, май. Барысын да бәйрәмгә чакырганнар. Шуннан соң барысы да болынга җыелып, елга буендагы урынны сайларга тырышканнар, кошлар оя корган урыннарга якынрак учак якканнар һәм ботка пешергәннәр. Ботка әзерләнгәндә, кешеләр милли уеннар уйнаган, әйлән-бәйлән әйләнеп, җырлар җырлаганнар.

Бу көнне дә алып баручылар Гөлназ Фәттахова һәм Сания Сәлимуллина балалар өчен чын күңел ачу оештырдылар: аларны халык уеннарына, әйлән-бәйләнгә җәлеп иттеләр, яз турында, кош-корт турында йола җырлары, милли ярышларда катнашырга тәкъдим иттеләр. Әлбәттә, җиңүчеләрне бүләкләр көтә иде. Уеннан канәгать калган балалар карга боткасы, коймак ашадылар, хуш исле чәй, компот эчтеләр. Бәйрәм мәҗлесеннән соң кош-кортларны да  сыйладылар. Аларның күңелен күтәрү өчен, ботка калдыкларын ташларга, агачларга, агач төпләренә салдылар, табигать көчләренә, кошларга мөрәҗәгать иттеләр, муллык, уңдырышлылык, уңыш сорап дога кылдылар. Кешеләр таралып беткәч, каргалар без калдырган ботканы ашадылар. Бәйрәмнең максаты балаларны ата-бабаларыбызның милли бәйрәме, аның тарихы һәм халык тормышындагы әһәмияте белән таныштыру иде. Нинди матур,шәп  халык бәйрәмнәре,  алар икенче тапкыр туу ала! Балалар һәм кунаклар яхшы кәеф белән өйләренә таралдылар.