Вахитта экологик викторина үткәрделәр

Бу көнне төрле илләрдә традиция буенча “Тынычлык чаңы” яңгырый, җир кешеләрен планетада тынычлыкны һәм уртак йортыбызның матурлыгын саклауга көч куярга чакыра. Кешеләрне планетабыздагы нәфис һәм яклаусыз әйләнә-тирәгә игътибарлырак булырга өнди.

Бу дата кысаларында Вахит мәдәният йорты мөдире Гөлназ Фәттахова «Җылы җиребез исемле планетаны сакла!" дигән экологик викторина үткәрде.

Катнашучылар белән илебезнең һәм тулаем Җир планетасының экологиясе турында әңгәмә уздырды. Планета - без яши торган һәм сакларга тиеш булган гаять зур һәм гүзәл йорт ул. Аңа ничек ярдәм итәргә? Балалар бу сорауга җавап бирергә тырыштылар. Алар Җир планетасы, аның атмосферасы, туфрак капламы, хайваннар һәм үсемлекләр дөньясы турында бик күп кызыклы мәгълүмат алдылар. Шулай ук аның язгы көн белән төн тигезләшү көнендә билгеләп үтелүен, планетаның биологик ритмы үзгәрүен, табигатьнең уянуын һәм яңаруын да белделәр.

Мәдәният хезмәткәре белән бергә табигать күренешләре турындагы мәкальләрне һәм әйтемнәрне искә төшерделәр, табигатьтә үз-үзеңне тоту кагыйдәләрен кабатладылар. Кызыл китапка кертелгән сирәк кошлар, бөҗәкләр, балыклар темасына бәхәсләштеләр. Викторина барышында балалар табигать турындагы табышмакларны чиштеләр, хайваннар һәм үсемлекләр тормышы турындагы сорауларга җавап бирделәр.

Укучыларның барысы да экологик викторинада яхшы белемнәрен күрсәттеләр, бик күп тәэсирләр һәм яхшы кәеф алдылар.