Татарстанда «Нурлы Рамазан» бәйрәм бизәлеше бәйгесе старт ала

Бу хакта республика мөселманнарының Диния нәзарәте игълан итте, ул мөселманнар өчен Изге ай алдыннан төбәктә үзенчәлекле атмосфера булдырырга чакыра. Дүртенче тапкыр узачак әлеге бәйге егерменче гыйнвардан унсигезенче февральгә кадәр дәвам итәчәк.

Катнашуга төрле оешмалар һәм шәхси затлар чакырыла. Гаризаны халык белән эшләүче иҗтимагый, коммерцияле, шәхси, бюджет һәм дини оешмалар бирә ала. Конкурста шулай ук физик затлар да катнаша ала. Жюри кафе, ресторан, кибет, сәүдә үзәкләренең, матурлык салоннарының, мәчетләрнең, уку йортларының, китапханәләрнең, офис биналарының, төрле җәмәгать урыннарының һәм хәтта торак йортларның бәйрәм бизәлешенә бәя бирәчәк.

Мөфтияттә хәбәр итүләренчә, бәйге җиңүчесе өчен төп бүләк - «ТР мөселманнары Диния нәзарәте Хаҗ" рәсми хаҗ-операторы биргән хаҗга юллама. Бәйгедә катнашу өчен гаризалар muslimmol.ru/nurlyramazan сылтамасы аша кабул ителә. Тулырак мәгълүмат белән "Нурлы Рамазан" бәйгесенең нигезләмәсендә танышырга мөмкин.

Белешмәләр өчен телефон: (843)237-86-18 (9:00-17:00).

Оештыручылар фикеренчә, бәйге бәйрәм бизәлеше традицияләрен саклап калырга һәм арттырырга, республика шәһәрләрендә һәм авылларында чын мәгънәсендә тантаналы һәм игелекле Рамазан ае мөхите тудырырга ярдәм итәчәк.