Татарстанда “Чиста урманнар” акциясе старт ала

Татарстанда “Татарстанның чиста урманнары” табигатьне саклау акциясенең язгы этабы башлана. Чара «Экологик иминлек» милли проекты максатларын гамәлгә ашыруга юнәлтелгән. 

Республиканың урман байлыкларын саклау – Татарстанда яшәүче барлык халыкның уртак бурычы. Ел саен уздырыла торган акция урманнарның санитар торышын яхшыртырга гына түгел, ә табигатьне саклау эшендә битараф булмаган кешеләрне дә берләштерә. Татарстан урман хуҗалыгы министрының беренче урынбасары Илгизәр Зарипов әйтеп үткәнчә, былтыр урман фондыннан утыз мең кеше катнашында сигез йөз куб.метр чүп-чар җыелган. Шулай ук биш мең ике йөз куб. метр коры-сары һәм ауган агач өемен черергә өеп куйганнар. 

Акция кысаларында урман фондын каты коммуналь калдыклардан, коры-сары һәм ауган агачлардан чистарту буенча масштаблы эшләр башкарылачак. Моннан тыш, республиканың урман хуҗалыгы белгечләре аншлаглар, мәгълүмат такталарын тәртипкә китерәчәк һәм урманга гөмбә, җиләк-җимеш җыярга яки саф һава суларга килгән кешеләр өчен ял итү урыннарын төзекләндерәчәкләр. 

Акциядә катнашырга барлык теләүчеләр чакырыла - оешмалар, уку йортлары вәкилләре һәм битараф булмаган гражданнар. Ә “Татарстанның чиста урманнары” акциясенең көзге этабы быел ундүртенче сентябрьдән ундүртенче ноябрьгә кадәр дәвам итәчәк.