Татарстанда җәйге пассажир навигациясе башлана

«Казан» елга портының рәсми сайтында хәбәр ителгәнчә, бу шимбәдә, 27 апрельдә, Идел буйлап җәйге пассажир навигациясе башлана. Теплоходның беренче рейсы Казан – Югары Ослан – Печище маршруты буенча китәчәк. 

Расписание мәгълүматлары буенча, бу маршрут буенча көн саен 4 рейс башкару планлаштырыла. 5.45, 8.30, 11.00 һәм 16.00 сәгатьләрдә теплоход Печищедан Югары Осланга (юл вакыты якынча 15 минут), Югары Осланнан Казанга китәчәк. Казаннан Югары Осланга 7.30, 10.00, 15.00 һәм 18.00 сәгатьләрдә китәргә мөмкин булачак.

29 апрельдән Кызыл Байракка кадәр даими рейслар башлана (Студенец, Садовая, Түбән Ослан, Ключищи, Матюшино, Ташевка, Гребени һәм Шелангага керү белән).

Шулай ук 1 майдан теплоходлар Свияжск һәм Түбән Осланга кадәр барачак.