Сулыкларда, боз өсләрендә сак булыгыз

Ныгып җитмәгән боз буйлап йөрү - бу тормыш өчен реаль куркыныч. Моны беренче һәлакәтләрнең берсе дәлилли: 12 декабрьдә Чистай районында вакытлы коткару посты коткаручылары һава мендәре судносы кулланып, балык тотканда Кама бозы астына егылып төшкән 21 яшьлек ир-атны коткарганнар. Һәлакәт урынында бозның калынлыгы 7 см дан да кимрәк. Вакыйга буенча материаллар зыян күрүчене административ җаваплылыкка тарту өчен муниципаль берәмлекнең административ инспекциясенә тапшырылган.

Ни өчен юка боз өстендә йөрү куркыныч?

Кыш кайчак алдаучан була: әйтерсең, барысы да тыныч һәм ышанычлы кебек, ләкин яшерен куркынычлар аяк астында гына. Яр буендагы агым тизрәк булган, үсемлекләр янәшәсендәге яки су бераз җылырак булган урыннар аеруча куркыныч. Үтә күренмәле боз авырлыкны күтәрә ала, ләкин әгәр ул ак, саргылт яки болганчык була башласа - димәк, ул үзенең тыгызлыгын югалткан һәм ышанычсыз.  

Үзебезне һәм балаларны ничек сакларга?

Балалар еш кына бозда уйнаганда саклык турында оныталар. Ата-аналар, һичшиксез, үз балаларына боз буйлап ялгыз йөрүнең никадәр зур куркыныч булуын искә төшерергә тиеш. Туңган сулыкларда уеннарны бөтенләй булдырмаска кирәк, чөнки фаҗигаләр кинәт һәм алдан фаразлап булмаслык була.

Әгәр дә кинәт бозга чыгып, ярылган урыннар яки сәер тавышлар ишетсәгез, башка билгеләр күрсәгез, шунда ук сак кына атлап, үз эзләрегез буйлап кире чыгыгыз. Шик туганда иң куркынычсыз юлны сайлап, чигенү яхшырак.

Әгәр дә бәла килеп чыккан икән, һәм сез боз астына төшеп киткәнсез икән, иң беренче эш - үз-үзеңне тота белү. Кычкырып тирә-юньдәгеләрне ярдәмгә чакырыгыз. Боз кырыена ике кулыгыз белән тотынып, горизонталь хәлдә калырга һәм гәүдәгезне өскә күтәрергә тырышыгыз. Аякка басар алдыннан, боз капламының ышанычлы булуына инану өчен, бераз артка тәгәрәп, бозның никадәр нык булуын тикшерегез.

Бәлага очраган берәр кешене коткарганда, бик мөһим бер кагыйдәне истә тотыгыз: боз кырыеннан шуышып барыгыз. Куркыныч урыннан ерак торганда зыян күрүчегә ярдәм кулын сузу өчен озын таяк, куртка яки бау кулланыгыз.  

Онытмагыз

* бозның калынлыгы 7 см дан ким булганда бозга чыгу катгый тыела;

* тимераякта ялгыз шуу бозның калынлыгы кимендә 12 см булганда рөхсәт ителә;

* тимераякта күпләп шуу бозның калынлыгы кимендә 25 см булганда рөхсәт ителә.

Татарстанда 7 см дан кимрәк калынлыктагы бозга чыккан өчен Татарстан Республикасы Административ хокук бозулар кодексының 3.10 маддәсе буенча 1500 сумнан 2000 сумга кадәр штраф яный.

Исегездә тотыгыз: гадәттән тыш хәл килеп чыкса, шунда ук бердәм коткару хезмәтенә 112 телефоны буенча шалтыратыгыз.