Мәчетләрдә мәктәп укучылары өчен түләүсез татар теле курслары башлана

Татарстанда үсеп килүче буын арасында татар телен үстерүгә һәм аңа ярдәм итүгә юнәлдерелгән масштаблы белем бирү проекты старт ала. Икенче марттан республиканың 62 мәчетендә һәм барлык Ислам мәгариф оешмаларында мәктәп укучылары өчен бушлай татар теле дәресләре башлана.

Проект Татарстан Республикасы Рәисе каршындагы татар телен һәм республикада яшәүче халыкларның туган телләрен саклау, үстерү мәсьәләләре буенча комиссия ярдәмендә гамәлгә ашырыла. Курслар Татарстанның 34 районында узачак, бу республиканың төрле почмакларыннан килгән балаларга сыйфатлы тел белеме алырга мөмкинлек бирәчәк.

Мәчетләрдән тыш, Татарстан Республикасы мөселманнары Диния нәзарәтенең әйдәп баручы Ислам мәгариф оешмалары да дәресләр өчен мәйданчыклар булачак. Алар арасында Казан ислам университеты, Россия ислам институты, сигез мәдрәсә, шулай ук Казанда «Госмания», Алабугада «Ихсан» мәктәпләре һәм Апас бистәсендә «Хаҗар» рухи-әхлакый үзәге бар. Дәресләрне барлык нокталарда да балалар белән эшләү тәҗрибәсе булган югары квалификацияле укытучылар алып барачак.

Татар теле курслары интенсив укытуга исәпләнгән: дәресләр атнага ике тапкыр икешәр сәгать дәвам итәчәк. Төп уку әсбабы булып Татарстан Фәннәр Академиясенең тел, әдәбият һәм сәнгать институтының әйдәп баручы фәнни хезмәткәре, филология фәннәре кандидаты, доцент, республиканың атказанган укытучысы М.Шәкүрова һәм Л.Гыйниятуллина тарафыннан эшләнгән   «Татарча сөйләшик. Давайте говорить по-татарски» китабы торачак. Бу дәреслек үзен телне тиз үзләштерү өчен нәтиҗәле ярдәмлек буларак танытты.

Мәчет алды курслары мөгаллимнәренә шулай ук өстәмә дәреслекләр һәм ярдәмлекләр тәкъдим ителде. Алар арасында авторлар Фираз һәм Чулпан Харисовларның «Рәсемле татарча-русча тематик сүзлек», шулай ук коллектив авторлы «Татарча сөйләшик. Давайте говорить по-татарски " китаплары тора. Бу материаллар балалар өчен дәресләрне тагын да төрлерәк һәм кызыклырак итәргә ярдәм итәчәк.

Курсларның эш программасы 48 дәрескә исәпләнгән һәм Россия ислам институтының татар теле һәм милли мәдәният кафедрасы тарафыннан Татарстан Республикасы Фәннәр академиясенең Г.Ибраһимов исемендәге Тел, әдәбият һәм сәнгать институты белән берлектә эшләнгән. Укытучыларга уңайлы булсын өчен махсус электрон платформа булдырылган, анда барлык кирәкле дәреслекләр, дидактик материаллар, презентацияләр һәм башка ресурслар тупланган.

Шунысын да билгеләп үтәргә кирәк, курслар барлык теләүче укучылар өчен бушлай. Укулар уңышлы тәмамланганнан соң, укучыларга алган белемнәрен раслаучы сертификатлар биреләчәк. Бу балаларга туган телләрен өйрәнергә ярдәм итеп кенә калмыйча, татар мәдәниятен һәм гореф-гадәтләрен алга таба да өйрәнергә өстәмә этәргеч булачак.  

Югары Ослан районында әлеге дәресләр район үзәгенең Салихҗан мәчетендә Гөлшат Җиһаншина җитәкчелегендә башланачак.