Кышын кошларны ашатырга онытмагыз

Бу экологик акция көздән алып яз уртасына кадәр барлык Россия төбәкләрендә инде 20 ел дәвамында  уздырыла. Аның рәсми башлангычы булып 12 ноябрь - Көзге кошлар көне һәм рус игенчелек календаре буенча Зиновий-синичник көне санала. 

Укучылар  бер дәресне саф һавада уздырдылар: балалар кошлар өчен сый-нигъмәтләр алып килделәр һәм елның салкын вакытында тамак туйдырырга ярдәм итү өчен җимлекләрне тутырдылар.

Балалар  кыш көне - күңелле бәйрәмнәр, тау шуу, кар атып уйнау гына түгел, җилле, көчле салкыннар да булуын аңлыйлар. Бу кышлаучы кошлар өчен иң авыр вакыт.

Укучылар фикеренчә, кошлар аларны ашата торган урыннарны һичшиксез истә калдырачак һәм көн саен төшке ашка җыелачак.