Китапханә хезмәткәрләре китап укырга чакыра

Китап уку мавыгу гына түгел, ә укуны чын ярату һәм аны яшәү рәвеше итеп санаган һәркемнең бәйрәме. Бу көн кәгазь битләренә дулкынлану белән караучыларга, кәгазь битләренең кыштырдавыннан ләззәт табучыларга һәм яраткан әсәрләрен кадерле хәзинә итеп саклаучыларга багышлана.

Бөтендөнья китап сөючеләр көне алдыннан район үзәк китапханәсе хезмәткәрләре «Китап - кәеф төсе» дигән тематик урам акциясе оештырдылар. Китапханәчеләр акциядә катнашучыларга бәйрәмнең тарихы, укуның үз-үзеңне үстерүдә, ял итүдә һәм эмоциональ яктан бушануга ничек ярдәм итүе турында сөйләделәр, төрле кәеф һәм максатлар өчен китаплар сайлау буенча киңәшләр бирделәр.

Очрашу азагында һәр кунакка адресы һәм китапханә турында кыскача мәгълүмат язылган «Китапханәгә чакырабыз» дигән файдалы буклет тапшырылды. Китапханә барлык авылдашларны китап укучылар рәтенә керергә чакыра.