Китапханә Фәрит Яхин иҗаты белән танышырга чакыра

Күргәзмәдә аның «Көзге яңгырларга кадәр», «Сөйкемле сөяк», «Ак әбиләр догасы» һ.б. әсәрләре тәкъдим ителгән.

Фәрит Яхин - күп санлы шигырьләр һәм проза җыентыклары, шулай ук монографияләр һәм мәкаләләр авторы, ул татар әдәбияты тарихын актив өйрәнә һәм әдәби жанрларның үсешен өйрәнә.

Күргәзмә килүчеләрне язучының иҗатында чагылган зирәклек һәм игелек дөньясына чумарга чакыра.

Шагыйрь, язучы-прозаик, әдәбият галиме Фәрит Зәкиҗан улы Яхин 1961 елның 2 гыйнва­рында Татарстанның Сарман районы Дүсем авы­лында туа. 1978–1983 елларда Казан дәүләт университетының тарих-филология факультетында белем ала, аннары, СССР Фәннәр академиясенең Казан фи­лиалы Г.Ибраһимов исемендәге Тел, әдәбият һәм тарих институты кар­шындагы аспирантураны тәмамлый.

 Г.Тукай музееның директоры булып эшләгәндә музейны яңарту, экспозицияләрен үзгәртеп кору, яңа экспонатлар белән баету, му­зейда даими рәвештә «Тукай укулары»н уздыру, сынлы сәнгать күргәзмәләре, төрле кичәләр, күренекле әдәбият-сәнгать әһелләре белән очрашулар оештыру кебек мәдәни эшләр башкара. Ул шигырьләр, хикәяләр яза, «Сарман таңна­ры» иҗат берләшмәсенең актив әгъзасы була. Сиксәненче елларда әдәби тәнкыйть эшенә тартыла. Туксанынчы еллар башыннан исә беренчеләрдән булып дини мәсьәләләрне яктырткан әдәби һәм фәнни хезмәтләрен язу эшенә керешә. «Пәйгамбәрләр тарихы» (1992), «Иман» (1993) дип аталган беренче китапла­ры белән киң җәмәгатьчелектә таныла.  Ул проза жанрында да актив иҗат итә, укучыларга көндәлек матбугатта басылган дистәләрчә хикәя, повестьлары һәм ике кисәктән торган «Август ае» дигән романы белән билгеле.