Яшьләр клубында чираттагы Батырлык дәресе узды

Дәрес алдыннан бишенче сыйныф укучылары маскировка челтәре бәйләргә булыштылар. Ә аннары, диалог формасында, Советлар Союзы геройларының исемнәрен һәм батырлыкларын искә төшерделәр: Л.Павличенко - данлыклы снайпер, Зоя Космодемьянская - диверсия-разведка группасы әгъзасы, Алексей Исаев - дошман пулеметын үз гәүдәсе белән каплаган якташыбыз, Алексей Маресьев - каты яраланганнан соң ике аягын да югалткан, ләкин протезлар белән йөрергә өйрәнеп, сафка баскан очучы.

Кабатлау – белем алуның анасы диләр. Балалар нәрсәнедер хәтерлиләр, кайберсен онытканнар, кайсыдыр мәгълүмат турында ишетмәгәннәр дә. Бу аларның гаебе түгел, бу безнең бәла. Бөек совет халкының намусын, батырлыгын, каһарманлыгын үзебезнең дә онытырга хакыбыз юк.

9 майга кадәр калган көннәрдә укучылар өчен тагын 20 Батырлык дәресе үткәреләчәк. Темалар да төрле һәм аларны үткәрү форматы да бер берсеннән аерыла.

Балалар дәресләрдән Бөек Ватан сугышының соңгы көннәре, фронттагы һәм тылдагы батырлар турында беләчәкләр.

Соңгы дәрес "Геройлар адреслары буенча" акциясе булачак, ул традициягә әверелде һәм 8 май кичендә узачак. Ватан өчен үз гомерләрен биргән МХОда катнашучылар да онытылмаячак.