Яңа ел бәйрәмнәрендә сәламәтлекне ничек саклап калырга?

Бу искиткеч ял көннәрен сәламәтлеккә зыян салып, урын өстендә үткәрмәс өчен, табиблар режим сакларга һәм организмны стресска дучар итмәскә киңәш итә.

- Яңа елга әзерләнү эшләрен тәртипкә китерегез, барысын да үзегезгә генә йөкләмәгез. Яңа ел өстәлен әзерләү, бүләкләр сатып алу, көнкүреш эшләре тыныч һәм гаилә белән бергә башкарылырга тиеш.

-Көндәлек туклану режимыннан тайпылмагыз, салат, икра, шампанский, бутербродлар  чама белән кулланылырга тиеш, «ашап бетерергә кирәк, югыйсә әрәм була»  кагыйдәсен үтәсәгез, артык авырлык һәм холестериныгыз артыр. 

-Иҗтимагый урыннарга йөргәндә шәхси гигиена кагыйдәләрен үтәгез: авыру кешеләр белән аралашмагыз, битлек киеп йөрегез, бәдрәфләрдә булганнан соң кулларыгызны юыгыз.

-Саф һавада күбрәк йөрегез, спортның актив төрләре белән шөгыльләнегез: чаңгыда, тимераякта шуыгыз, кышкы урманда җәяү йөрегез. Бу йөрәк-кан тамырлары системасы, терәк-хәрәкәт аппараты һәм, гомумән, иммунитет өчен уңайлы вакыт. 

 -Йөрергә чыкканда җылырак киенергә, мамык киемнәр сайларга, кайнар чәй һәм запас бияләйләр алырга онытмагыз. Шунысы мөһим: урамда алкоголь кулланудан тыелыгыз.

Ял итү өчен куркынычсыз урыннарны сайлагыз ! Сау-сәламәт һәм бәхетле булыгыз!