Татарстанда машина йөртүчеләргә һәм гөмбәчеләргә пошилар парлашу чорында саклык турында искә төшерделәр

Татарстанда поши куышы (парлашу) башланды, ә бу вакытта ата тояклылар аеруча актив. Республикада яшәүчеләргә, бигрәк тә машина йөртүчеләргә һәм гөмбәчеләргә, аеруча уяулык күрсәтергә кирәк, дип хәбәр итә  ТР Дәүләт биоресурслар комитеты.  

Никах чорында ата пошилар бер-берсе белән бәрелешкә керә, көчле тавыш белән үкерәләр, юлларга чыгалар, ана пошины куып тотарга омтылалар.

Шуңа күрә гөмбәчеләргә һәм башка табигатьтә йөрергә яратучыларга пошиларга якынаерга киңәш ителми, аларга тыныч кына урманга кереп китәргә яисә юлны аркылы чыгарга мөмкинлек бирергә кирәк.  

Үз чиратында машина йөртүчеләргә "тизлек режимын сакларга, хайваннарның трассага чыгу мөмкинлеге турындагы кисәтү билгеләренә игътибар белән карарга һәм сәфәрләрне планлаштырганда бик сак булырга кирәк". Бу бигрәк тә тәүлекнең караңгы вакытына карый, аңа кыргый хайваннар белән бәрелешләрнең 80%тан артыгы туры килә.  

Әгәр дә машина йөртүче үзе бәргән, юлда яралы яисә үлгән кыргый хайванны тапкан икән, аңа бу хакта кичекмәстән 112 ашыгыч хезмәте телефоны буенча хәбәр итәргә кирәк.