Мулланур Вахитов авылында “Авылымның хатын-кызлары - уңган хуҗабикәләр” дип исемләнгән бәйрәм кичәсе узды

   Халыкара хатын-кызлар бәйрәме уңаеннан Вахит авылы мәдәният йортында китапханә җитәкчесе белән берлектә “Авылымның хатын-кызлары - уңган хуҗабикәләр” дигән бәйрәм кичәсе булды. Мавыктыргыч кичәдә 22 хатын-кыз катнашты. Алар барысы да ягымлы, эшчән, булдыклы, күркәм, гүзәл, тырыш икәнлекләрен тагын бер кат исбатлап күрсәттеләр.

Авыл хатын-кызлары  табын өстәленә үз куллары белән пешергән  татар халкының милли ризыкларын алып килгәннәр иде. Араларында  һәрберсе гаиләдә өчәр-дүртәр бала үстерүче үрнәк, кайгыртучан әни, тугры тормыш иптәше, уңган хуҗабикәләребез дә бар иде. Бәйрәм кызыклы ярышлар, уеннар, җыр-биюләр белән үрелеп барды.

Әлеге матур бәйрәм  күңел ачу гына түгел, ә шушы тамаша аша татар халкының йөзек кашы, намуслы киләчәге булган хатын-кызларыбызның милли йөзен саклап калу, халкыбызның асыл сыйфатларын күрсәтү максаты белән үткәрелде. Клуб мөдире Гөлназ Фаттахова татар милли ризыклар тарихы белән дә таныштырды. Аннан бәйрәм табынына гөбәдия, кош теле, чәк-чәк, заманча ашлар әзерләү серләре ачылды, аш-су рецептлары бирелде. 

Кичәдә матур җырлар җырланды, уеннар уйналды. Шулай ук Гөлсинә Хайруллина белән Гөлсәрия  Галиева әниләр турында үзләре язган шигырьләрен укыдылар. Кичә чәй табыны артында бик матур, бәйрәм рухында узды.