Югары Ослан районында урып-җыю кампаниясен башларга барысы да әзер

Май аенда һава торышы аномаль суык булуга карамастан, Югары Ослан районы кырларында яхшы уңыш үстерелгән.  

Бүгенге көнгә "Заря" ҖЧҖ барлык урып-җыю комплексын: ындыр табагы хуҗалыгын, складларны, ашлык җыю комбайннарын һәм транспортны тулысынча әзерләгән. Якын көннәрдә бөртеклеләрне суктыра башлаячаклар. Ә әлегә уҗымнар өемгә уралган. Комбайнчылар уракка төшүгә бик җаваплы карыйлар: алар- Пётр Коновалов, Василий Кульков, Евгений Трофимов һәм Валерий Коновалов. Барлыгы 1300 гектар бөртекле культураларны җыясы бар. Комбайнчыларга тырыш хезмәтләре өчен түләү һәм өстәмә бүләкләү чаралары билгеләп үтелде. Җитәкчелек барысын да махсус эш киемнәре, янгын сүндерү чаралары, ремонт звенолары һәм кайнар туклану белән тәэмин итте.