Үз эшенә гашыйк табиб

Бик нәзакәтле, нечкә, нәфис, изге һөнәр ияләре бар. Алар сабыйлар, әниләр гомере өчен көрәшеп, аларга тормыш бүләк итәләр, кешенең тәнен генә дәвалап калмый, күңеленең иң нечкә кылларына кагыла, авырулар табиб белән иң тирән, үзләре генә белгән хискичерешләре белән уртаклаша. Шундый һөнәр иясе Югары Ослан үзәк хастаханәсендә эшләүче табиб – акушер-гинеколог Чулпан Миннәтулла кызы Ибәтуллина.

Чулпан ерак Магадан өлкәсендә гаиләдә икенче бала булып туа. Ә бишенче класстан ул укуын Шеланга мәктәбендә дәвам итә, алар районыбызга кайтып урнаша. Әтисе машина йөртүче, әнисе тәрбияче булып эшлиләр. Урта мәктәпне алтын медальгә тәмамлап, ул кечкенәдән хыялында йөрткән Казан дәүләт медицина университетына укырга керә. Аны уңышлы тәмамлап, 2012 елдан Чулпан Миннәтулла кызы районыбызда эшли башлый. Урнашып, эшне башлап җибәрергә аңа республикабызда барган “Земский доктор” программасы ярдәм итә. Яшь булуына карамастан, эшләү дәверендә ул пациентларының хөрмәтен, ышанычын яулап өлгерде инде.

Табиб-гинеколог хатын-кызларны, балаларны яратырга тиеш. Алар йөкле хатын-кызлар белән эшлиләр, ә бу бер кешедә ике пациент дигән сүз. Хатын-кыз табибларының эше игелекле һәм сабыр булырга өнди, шул ук вакытта аларга психолог та булырга кирәк.

Чулпан ханымның әти-әнисе, гаиләсе аңа терәк, ире Айдар Фәрит улы белән уллары Алмазны үстерәләр. Айдар Казан банкларының берсендә эшли.

Әңгәмә барышында Чулпан Миннәтулла кызы эшендә очраган кызыклы очракларны да искә төшереп үтте: “Минем хәтеремдэ, йөклелек белән учетта торган иң яшь әнигә - 14 яшь, иң олысына 47 яшь иде. Икесе дә, Аллаһыга шөкер, үз вакытында сау-сәламэт бәбиле булдылар! Ә иң яшь пациентыма 1 ай, иң олысына 92 яшь. Хатын-кызларның бездән сәламәт, бәхетле булып китүләре, рәхмәт сүзләре әйтүләре сөендерә, бу – эшемнең иң шатлыклы, канәгатьлек китерә торган мизгелләре.

“Саулык ин зур байлык" - ди халык. Чыннанда, сәламәтлек - кеше бәхетенең нигезе, исәнлек булганда гына кеше узенең теләкләренә ирешә, яшәудэн тәм таба, шуңа курә барлык укучыларга иң беренче сәламәтлек теләп калам! Сәламәтлекне булганда кадерлик һәм саклыйк!” , - дип теләкләрен җиткерде Чулпан Миннәтулла кызы.

Чулпан Миннәтулла кызы әңгәмә вакытында үзенең чын табиб икәнен онытмады, хатын-кызларга киңәшләрен бирде:

• - Сәламәтлек борчымаса да елына бер тапкыр табибка күренергә кирәк. Ярты елга бер күренсәң тагын да яхшы. Анализлар тапшыру, УЗИ, онкоцитология, маммография үтү беркемгә дә комачау итми.
• - Ел саен диспансеризация узарга (экг, глюкоза, холестерин дәрәҗәсен бәяләргә, канны гомуми анализга бирергә).
• - Үз-үзеңне дәвалау белән шөгыльләнмәскә. - Гигиена кагыйдәләрен үтәргә. - Дөрес туклануны да онытмаска кирәк.