Татарстанда 103 номерлы бердәм ашыгыч ярдәм диспетчерлык хезмәте эшли башлады

Татарстанда үзәкләштерелгән ашыгыч ярдәм диспетчерлык хезмәтен төзү төгәлләнде. Хәзер 103 номерына шалтырату Бердәм контакт-үзәктә кабул ителә, дип хәбәр итә республиканың сәламәтлек саклау министрлыгы. Ашыгыч ярдәмне шәһәр телефоннарыннан да, кәрәзле телефоннардан да бушлай 103 номеры буенча чакырырга мөмкин. Шуны истә тотарга кирәк: элек эшләгән 03 номеры хәзер эшләми.

Элек 103 номеры буенча чакырулар төрле төбәкләрнең медицина оешмалары аша кабул ителә иде. 2019 елдан республикада чакыруларны кабул итү һәм диспетчерлаштыру буенча бердәм мәгълүмати система кертелә башлады. Узган елның мартыннан яңа телекоммуникация платформасы аша Казан территориясеннән барлык шалтыратулар кабул ителә башлады. Һәм менә 2026 елның апреленнән бердәм үзәкләштерелгән диспетчерлык хезмәте бөтен республиканы колачлый. Татарстан буенча сәгатенә өч йөзгә якын чакыру кабул ителә. 

Яңа хезмәтнең төзелеше

Хезмәт структурасы бүленгән, ике контакт-үзәк - Казанда һәм Чаллыда урнашкан. Бу мөмкин булган өзеклекләр очрагында ышанычлы резервлау өчен эшләнгән. Әгәр бер үзәк вакытлыча эшләмәсә, икенчесе чакыруларны тулы күләмдә кабул итүен дәвам итәчәк.

Яңа система үз эченә нәрсәне ала? "Челтәр белән идарә итү үзәге» принцибы буенча төзелгән махсус программа-аппарат: операторлар өчен эш урыннарын оештыруның бердәм стандартлары, IP-телефония кулланып элемтәнең типик схемалары, каналларны резервлау һәм мәгълүматларны эшкәртү үзәгенә карата катгый таләпләрне үз эченә ала. Шулай ук диспетчерлаштыру алгоритмнары, чакыруга хезмәт күрсәтү вакыты нормативлары һәм башка ашыгыч оператив хезмәтләр белән хезмәттәшлек схемалары эшләнгән.

Пациентлар өчен үзгәрешләр

Бердәм үзәктә барлык чакырулар агымы җыела. Шалтырату вакыты, чакыруны кабул итү вакыты һәм башка параметрлар буенча бердәм үлчәнә торган нәтиҗәлелек күрсәткечләре кертелде. Бу күрсәткечләр система тарафыннан автоматик режимда исәпкә алына, бу кеше факторын булдырмый кала.

Үзәкләштерелгән идарәнең төп аермасы шунда: бригадаларны беркетелгән хезмәт күрсәтү зонасына беркетү урынына хәзер челтәр принцибы кулланыла. Бригада якындагы чакыруга реаль вакытта җибәрелә, ә пациентны госпитализацияләгәннән соң, подстанциягә кире кайтмыйча, башка зонадан икенче чакыруга күчерелергә мөмкин. Шулай итеп, 103 кә шалтыратканда республиканың теләсә кайсы кешесе бердәм үзәккә эләгә, анда аны тәҗрибәле диспетчерлар кабул итә һәм мөмкин булган иң аз вакыт эчендә якындагы бригаданы ярдәмгә җибәрә.  

112 номерын да белү мөһим

Республикада шулай ук ашыгыч хезмәтләрнең бердәм номеры - 112 бар. Аны берьюлы берничә хезмәтнең, мәсәлән, полиция һәм ашыгыч ярдәмнең ярдәме таләп ителсә, кулланырга киңәш ителә. 112 номеры тәүлек буе һәм бушлай эшли.

103 кә шалтыратканда хәбәр итәргә кирәкле мәгълүмат

Ашыгыч ярдщмне чакыручы чакыруны кабул итүче хезмәткәрнең барлык сорауларына төгәл җавап бирергә тиеш. Авыруның чакыру сәбәбен, фамилиясен, исемен һәм атасының исемен, чакыру урынын һәм төгәл адресын: районны, шәһәрне, урамны, йорт, фатир номерын, подъездның кодын һәм номерын, телефон номерын һәм мөмкин булган җәмәгать ориентирларын күрсәтергә кирәк. Әгәр авыруның яки зыян күрүченең фамилиясе, исеме һәм атасының исеме билгеле булмаса, җенесен һәм якынча яшен әйтергә кирәк.

Фельдшер, бирелгән сорауларга тулы җавап алгач, чакыручыга: «Сезнең чакыру кабул ителде», - дип җавап бирсә, чакыруны кабул итү вакытын әйтсә һәм адресын кабатласа гына, чакыру кабул ителгән дип санала. 

Кайчан ашыгыч ярдәмне чакырырга кирәк

Өйдә, урамда, җәмәгать урыннарында килеп чыккан кискен авыруларның барлык очракларында да ашыгыч ярдәм чакырырга кирәк. Массакүләм һәлакәтләр һәм стихияле бәла-казалар вакытында. Бәхетсезлек очраклары, җәрәхәтләр, имгәнүләр, пешүләр, электр тогы белән зарарланулар, суга батулар, өшүләр һәм агуланулар булганда. Авыруның тормышына куркыныч тудыручы кискен авырулар булганда: болар - йөрәк-кан тамырлары һәм үзәк нерв системасы, сулыш органнары, корсак куышлыгы эшчәнлегенең кискен үсеш алган бозылулары, көзән җыеру, барлык төр кан китүләр.

Шулай ук ашыгыч ярдәмне бала тапканда һәм йөклелекнең теләсә кайсы срогының нормаль агымы бозылганда чакыралар. Бер яшькә кадәрге балаларга ашыгыч ярдәмне теләсә нинди сәбәп белән чакыралар. Психоневрологик авыруларга - әйләнә-тирәдәгеләрнең һәм авыруның үзе өчен куркыныч булган кискен психик тайпылышлар вакытында. 

Ашыгыч ярдәмгә түгел, ә башка белгечләргә мөрәҗәгать иткәндә

Ашыгыч ярдәмгә түгел, ә участок табибына яки поликлиникага мөрәҗәгать итү яхшырак булган очраклар да бар. Бу - участок табибы күзәткән авыруның сәламәтлеге начарлану очраклары: температура күтәрелү, баш авырту, кан басымы күтәрелү, хроник авырулар кискенләшү. Искәрмә - тормыш өчен куркыныч булган кискен халәтләр.

Шулай ук махмыр синдромын бетерү өчен хроник алкоголизм белән авыручыларга ашыгыч ярдәм чакыртырга кирәкми. Ашыгыч ярдәм планлы дәвалау кысаларында билгеләнгән дәвалау процедураларын, инъекцияләрне, бәйләүләрне башкару өчен каралмаган. Үлгән кешене карау, үлем турында актлар төзү, суд-медицина һәм эксперт бәяләмәләре бирү, алкоголь һәм наркологик исереклек билгеләү өчен ашыгыч ярдәм чакыртырга кирәкми. Ашыгыч ярдәм авыруларга һәм аларның туганнарына хастаханә кәгазьләре, рецептлар һәм язма белешмәләр бирми. Һәм, ниһаять, ашыгыч ярдәм стационардан һәм башка дәвалау-профилактика оешмаларыннан авыруларны өйләренә алып кайту өчен каралмаган.