Районда “Сәйяр” театр бәйгесенең муниципаль этабы узды

Фестиваль балаларда рухи мәдәният һәм милли мираска сак караш тәрбияләү максатыннан үткәрелә.

Фестивальнеӊ төп бурычы - яшь буынның татар язучылары һәм драматурглары иҗатын өйрәнүгә теләген арттыру, театр сәнгатенә игътибарын җәлеп итү, балалар һәм яшьләргә әхлакый тәрбия бирү, иҗади сәләтле укучыларны ачыклау һәм аларга ярдәм итү.  

Ул мәктәп, район, зона һәм республика турларын үз эченә алып, 2025 нче елныӊ январеннән май аена кадәр дәвам итә. Шушы көннәрдә районыбызда фестивальнең “Сәхнә көзгесе” дип аталган муниципаль этабына нәтиҗә ясалды.

Бәйгегә мәктәпкәчә белем бирү оешмалары “Каенкай”, “Салават күпере” балалар бакчасы, Яр буе Морквашы, Куралово, Иннополис, Түбән Ослан, Макыл, Коргуза, Шеланга мәктәпләре үзләренең иҗат җимешләрен тапшырдылар. Дәрәҗәле жюри тарафыннан урыннарны билгеләгәндә татар телендә куелган спектакльләр мәктәпкәчә яшьтәге балалар, 1-4 нче сыйныфлар, 5-8 нче сыйныфлар төркемнәренә бүлеп каралды. Муниципаль этапның җиңүчеләре булып “Каенкай”, “Салават күпере” балалар бакчасы, Яр буе Морквашы, Куралово, Шеланга, Макыл мәктәпләре төркемнәре чыкты. Район фестивалендә һәр номинацияда 1-3 нче урынны яулаучыларны бу көннәрдә республикада махсус комиссия карый. Җиңүчеләр зона бәйгесендә катнашачак. 

Шулай ук “Сәйяр” театр фестивале республика  бәйгесенең муниципаль этабында 1,2,3 нче урынны алучыларга һәм лауреатларга Югары Ослан район башкарма комитеты мәгариф идарәсенең дипломнары һәм Татарстан Республикасы Рәисе каршындагы Татар телен һәм башка телләрне саклау һәм үстерү  мәсьәләләре комиссиясенең бүләкләре тапшырылачак. 

“Моннән 3 ел элек район мәктәпләре һәм балалар бакчаларында федераль дәүләт стандартларының сыйныфтан тыш эшчәнлек сәгатьләре хисабына татар телендә театр түгәрәкләре ачып җибәргән идек. Бу юнәлешне мин бик кирәк, дип саныйм. Чөнки безнең рус телле районыбыз җирлегендәге укучылар Конституция буенча тиеш дип каралган татар телен дәүләт теле итеп сайласыннар, аны аңласыннар һәм белсеннәр өчен, һичшиксез, бик кулай адым бу. Бала эш процессында, үзе теләп диалогка керә, сөйләмгә тартыла, уй-кичерешләрен башкаларга җиткерә", - дип аңлатып бирде бу күренешне мәктәпләрдә балалар сәнгать театрларын оештырып җибәрүче милли мәсьәләләр буенча мәгариф бүлеге методисты Гөлгенә Дәүләтшина.

Исегезгә төшерәбез, “Сәйяр” балалар һәм яшүсмерләр театрларының республика фестивален үткәрү “Һәр баланың уңышы” федераль проекты кысаларында “Мәгариф” милли проектының максатларына һәм бурычларына туры килә.