Мәмәтхуҗада шахмат тактасының серләренә төшенделәр

Чара барышында мәдәният йорты мөдире Алефтина Саттарова балаларга шахматның нинди серле һәм могҗизалы дөнья икәнен сөйләде. Ерак Һиндстанда уйлап табылган уен борынгы заманнардан ук бик күп үзгәрешләр кичергән. Түгәрәк һәм цилиндр формасындагы такталарда шахматлар да барлыкка килгән, мәсәлән, Кытайда үзгәртелгән фигуралар белән бу уен «сянцы» исемен алган, Япониядә шахматларны гади квадратларга, теге яки бу фигураны белдерә торган иероглифлар белән тактада уйныйлар һәм уен – «сеги»дип атала. Шунысы гаҗәп, әлегә кадәр бер генә компьютер да шахматтагы комбинацияләрнең төгәл санын саный алмаган.

Балалар уен турында күп мәгүлүмат белеп кенә калмадылар, үз көчләрен практикада сынап карый алдылар – бер-берсе белән берничә партия уйнадылар. Алар зур кызыксыну белән уйнарга өйрәнделәр, хәрәкәтләр һәм алымнар турында уйладылар, партия ахырына якынлашканда дәртләнеп, дуслары өчен җан аттылар.