Кызыл Байракта Җиңү көнен тантана һәм концерт белән билгеләп үттеләр

Сәламләү сүзе белән Шеланга авыл җирлеге башлыгы  В.Майоров чыгыш ясады. Митинг барышында ата-бабаларыбызның батырлыгын искә төшереп кенә калмадылар, бүген Ватаныбыз сагында торучылар турында да сөйләштеләр.

Татарстан Республикасында хәрби һәм хезмәт батырлыгы елында Россия Федерациясе һәм Татарстан Республикасы Гимннары астында Бөек Ватан сугышында катнашучыларны, тыл хезмәтчәннәрен һәм Кызыл Байрак авылының һәм бөтен илебезнең "сугыш балаларын" искә алдылар һәм хөрмәтләделәр. Һәлак булганнарны бер минут тынлык белән искә алдылар һәм һәлак булган геройлар һәйкәленә чәчәкләр салдылар.

Тантаналы митингтан соң барысын да бәйрәм концерты көтте. Шеланга авыл мәдәният йорты иҗат коллективы үз чыгышларын тәкъдим итте, алар башкаруында сугыш еллары җырлары һәм заманча хәрби композицияләр яңгырады. Тамашачылар бергәләп Мәрьям Таҗиевага кушылып җырладылар, ул легендар "Катюша" җырын башкарып барысын да таң калдырды. Казан кунагы – И.В.Әүхәдиев исемендәге Казан музыка училищесы студентының музыкаль номеры беркемне дә битараф калдырмады. Ул "Җиңү көне" җырын җырлады, ә кунаклар аңа аягүрә басып, туктаусыз алкышлар астында кушылып җырладылар. Концертта балалар да актив катнашты! Әхмәровлар Мия һәм Камил, Козлова Настя Муса Җәлил әсәрләрен, ә Сиченкова Аделина Габдулла Тукай шигырен тирән эчтәлекле итеп укыдылар. Вика Бровко барысы өчен дә музыкаль композицияне скрипкада, ә Таҗиев Самат гитарада оста уйнады. Әхмәрова Миа һәм Дмитриева Камилла башкаруында татар телендә күңелле җырлар яңгырады. Ә концерт азагында балалар бердәм хор белән "Прадедушка" җырын җырладылар.

Бәйрәм концерты вакытында кыр кухнясы эшләде, теләгән һәркем солдат боткасы һәм кайнар чәй белән сыйланды.

Татарстан Республикасында хәрби һәм хезмәт батырлыгы һәм Россия халыклары бердәмлеге елында фронт һәм тыл геройларына багышланган чара ата-бабаларга хөрмәт һәм горурлык, буыннар бердәмлеге рухы белән тулыланды.