Кызыл Байракта балалар дуслык кадерен аңларга өйрәнә

Балалар бик теләп «Сикергеч», «Куышулар», «Кайнар бәрәңге» кебек хәрәкәтчән уеннар уйнадылар. Күңелле спорт уеннары һәм эстафеталар балаларның күңелләрен күтәрде. Өстәл уеннары шулай ук шатлыклы хисләр һәм дәрт чыганагы булды.

Балалар өчен әдәби конкурс та әзерләнде. Балалар "Җәйге битләр" викторинасы сорауларына һәм җәй турындагы табышмакларга җавап бирделәр. Ахырда “Тукайны бергәләп укыйбыз" Республика проекты кысаларында балалар җәйге табигатьтә Габдулла Тукайның ике телдә язылган «Җәй көнендә» шигырен укыдылар. Әлеге шигырьдәТукай эссе җәй көнендә табигать һәм кешеләр тормышын, хәлдән тайдыргыч эсселек, ә аннан соң — сафландыручы яшен картинасын тасвирлый. «Җәй көне» шигырендә Тукай үзенең «кечкенә шатлыклар» фәлсәфәсен ача: бәхет — бөек казанышларда түгел, бәлки тирә-юньдәге матурлыкны күрә белүдә һәм туган якның кадерен аңлауда. Шагыйрь бәхетне гади нәрсәләрдә: җылы җилдә, үлән исендә, балалар уеннарында, авыл тормышының тыныч агымында табарга мөмкинлеген раслый. Бу картиналар аша Тукай патриотик хисне чагылдыра: Ватанга мәхәббәт аның табигатенә мәхәббәттән башлана. Балалар, аларның уеннары һәм авыл көнкүреше буыннар бәйләнешен һәм туган туфракта тамыр җәйгәнлекне ассызыклый.

Чара күңелле һәм кызыклы узды. Бу яшьтә социаль элемтәләрне үстерү һәм дус булырга өйрәнү аеруча мөһим. Менә ни өчен җәйге каникуллар бик кыйммәтле — алар балаларга күңел ачарга гына түгел, дуслык бәйләнешләрен дә ныгытырга мөмкинлек бирә.