«Каенкай» балалары истәлекле урыннарда булдылар

Әлеге экскурсиянең максаты - балаларны туган авылы, аның истәлекле урыннары белән таныштыруны дәвам итү, аларга совет халкының Бөек Ватан сугышында Җиңүенең әһәмиятен җиткерү, Ватаныбызның, армиябезнең хәрби тарихына кызыксыну уяту, илебезне саклаучы сугышчыларга мәхәббәт һәм хөрмәт тәрбияләү, сугыш турындагы истәлекләрне истә тотарга һәм сакларга чакыру иде.

Балаларга Югары Ослан үзәгендә паркның ничек һәм ни өчен төзелүе, аның белән бәйле традицияләр, ни өчен кешеләрнең һәлак булган батырларны искә алулары һәм аларны данлау турында сөйләделәр.

Балалар геройлар паркының өч аллеяга бүленгәнлеген белделәр. Беренчесе - авыл җирлекләреннән алынган, анда күпме кешенең фронтка китүе, күпме кешенең җиңү белән кайтуы һәм күпме кешенең сугышта башларын салуы күрсәтелгән. Икенче аллея Советлар Союзы Геройларына багышлана. Ә өченчесендә - Социалистик Хезмәт Геройларына, локаль сугышларда һәлак булганнарга истәлек такталары урнаштырылган. Балалар геройлар паркының төп экспонатлары булган сугыш еллары техникасын да зур кызыксыну белән карадылар. 

Мәктәпкәчә яшьтәге балалар мәңгелек ут янында һәлак булганнарны бер минут тынлык белән искә алдылар, шулай ук Бөек Ватан сугышы вакыйгалары турында белделәр. Алар бүгенге көндә безнең киләчәк буыннарга сугыш кырларында һәлак булганнарның, госпитальләрдә яралардан үлгәннәрнең, хәбәрсез югалганнарның, фронтта һәм тылда үз көчләрен, гомерләрен һәм сәламәтлекләрен кызганмаган кешеләрнең яхшы истәлеген саклап калудан да мөһимрәк бурычыбыз юклыгын аңладылар. Сугыштан соң бик күп тугандаш каберләр, обелисклар, мемориаллар, һәйкәлләр барлыкка килде. Алар янына Россияне саклаучылар истәлеген хөрмәтләү өчен кешеләр килә. Безнең хәтер – безнең көч. Ватанны саклаучыларның батырлыгын истә тотканда, без җиңелмәячәкбез.