Яңа Юл авылында халык традицияләрен яңадан торгызалар

Яңа Юл авыл клубы мөдире Сәрия Ефимова язгы каникул көннәрендә Россия халыкларының халык сәнгате һәм матди булмаган мәдәни мирас елы кысаларында мәктәп укучылары өчен «Орчык өмәсе» үткәрде. Сәрия Әграт кызы бәйрәмнең килеп чыгу тарихы турында сөйләде, йон эшкәртүнең һәр этабын күрсәтте, орчык белән таныштырды һәм эрләргә өйрәтте.  Аннары бергәләп «Орчык тәгәрәтү», «Йомгак» халык уеннары уйнадылар.

- Безнең бурыч - үсеп килүче буынга милли гореф-гадәтләрне тапшыру. Кызганычка каршы, бу бәйрәм күптән үз актуальлеген югалтты, әмма без үз тарихыбызны һәм күркәм традицияләребезне саклап калырга тиеш, - ди Сәрия Ефимова.