Сөлгеләр һәм бүләкләр җыю - Сабантуй җитүгә хәбәр

Быел ул 10 нчы июньдә Югары Осланның район үзәгендә, 11 нче июньдә М.Вахитов исемендәге авылда узачак. Борынгы заманнардан бирле бу бәйрәмнең бер өлеше булып бүләкләр җыю саналган. Бүләкләрне төрле уеннарда җиңүчеләргә, шулай ук көрәш буенча абсолют батыр өчен җыйганнар.
  30 нчы майда Вахитов мәдәният йорты һәм авыл китапханәсе, Бакча-Сарай, Яңа Юл авыл клублары мәдәният хезмәткәрләре, Югары Ослан районының "Иделкәй" вокаль коллективы җитәкчесе Мөхетдинова Илсөяр Камил кызы үзенең оста гармунчысы Сөләйманов Әмир Әнвәр улы белән Шура, Вахитово, Ватан, Яңа - Болгар, Бакчасарай авылларында сөлгеләр җыю оештырдылар һәм авыл халкын Сабантуй бәйрәменә чакырдылар. Сөлгеләр һәм бүләкләр җыю-Сабантуй җитүгә хәбәр ул. Матур милли киемнәрдә мәдәният хезмәткәрләре һәм балалар гармунда җырлар  һәм биюләр белән авыллар буйлап йөрделәр һәм барысын да бәйрәм өчен бүләкләр җыюда катнашырга чакырдылар. Гармунның моңлы тавышын ишетеп, өйләрдән кешеләр чыгып, артистлар белән бергә биеделәр, Сабантуй бәйрәме өчен әзерләгән бүләкләрен бирделәр. Сабантуйның милли үзенчәлеге шунда ки, ярышларда катнашучы һәркем, һичшиксез, үзенең хыялында булган бүләк алачак. Бүләкләр өчен махсус таләпләр юк. Традицион бүләкләр булып яулыклар һәм матур итеп чигелгән сөлгеләр санала. Җыелган барлык бүләкләр Сабантуй фондына җибәреләчәк. Озын колгага бәйләнгән бүләкләр Сабантуй бәйрәмендә иң көчле батырларга бүләк ителәчәк.

Сөлге җыю тарихы

Фәнни чыганакларда хәбәр ителгәнчә, Сабантуй алдыннан бүләкләр җыю традициясе ерак үткәннәргә барып тоташа. Борынгы заманда, басуларда кар беткәч, авыл аксакаллары бергә җыелып,  Сабантуйны кайсы көнне бәйрәм итәчәкләрен хәл иткәннәр. Билгеләнгән көн алдыннан егетләр атларга атланып ярышларда җиңүчегә бүләкләр җыярга чыгып китәләр. Беркем дә аларга каршы килмәгән. Авыл халкы  бәйрәм өчен чигелгән яулык, ситсы кисәкләре, күлмәкләр, тавык йомыркалары, ярмалар әзерләгәннәр. Кайбер авылларда иң яхшы саналган 50 ләп ат җигеп йөргәннәр. Җыелган күлмәкләрне, яулыкларны, сөлгеләрне ат җепләренә беркеткәннәр. Аеруча кыйммәтле бүләк итеп тукыма, бизәкле сөлге саналган. Аны соңгы ике сабантуй арасында кияүгә чыккан яшь хатын-кызлар әзерләгән. Бүләкләр җыю шаяртулар,уеннар,җырлар белән узган.