Яшь җырчы Алия Хәлимова «Илһам чишмәсе» бәйгесендә III урын яулады

18 – 19 февраль кеннәрендә узган «Илһам чишмәсе»  бәйгесенең төп максаты – җырчы Илһам Шакировның иҗатын таныту, аның исемен мәңгеләштерү, яшь буынны тәрбияләү һәм халык традицияләренә җәлеп итү. Сарманда узган бәйгедә Татарстан, Башкортстан, Марий Эл, Удмуртия, Чувашия Республикалары, Оренбург өлкәсе, Мәскәү шәһәреннән 6 яшьтән 21 яшькә хәтле җырчылар катнашты. 

Бәйге «Вокал соло» номинациясендә үткәрелде. Алия татар телендә Илһам Шакиров репертуарыннан бер халык һәм бер автор җырын башкарды.

Сайлап алу турын узганнан соң, ә бәйгедә катнашырга быел 150дән артык гариза килгән булган, Алия «Илһам чишмәсе»ндә лаеклы чыгыш ясады һәм III дәрәҗәле диплом белән бүләкләнде. Алияне һәм аның җитәкчесе Г. Нигъмәтҗанованы котлыйбыз һәм киләчәктә дә уңышлар телибез.